ប្រែសម្រួល៖ សហការី
បាងកក៖ នៅថ្ងៃសុក្រ ទី២៤ ខែវិច្ឆិកានេះក្រសួងទេសចរណ៍ថៃ (TAT) បានធ្វើការអះអាងថានឹងទទួលបានភ្ញៀវទេសចរចិនចាប់ពី ៣,៤ ទៅ ៣,៥ លាននាក់នៅក្នុងឆ្នាំនេះគឺទាបជាងគោលដៅរបស់ខ្លួនបើទោះបីជាបានចេញនូវគោលនយោបាយគ្មានទិដ្ឋាការ ដើម្បីទាក់ទាញភ្ញៀវទេសចរចិនក៏ដោយ។
របាយការណ៍បានបង្ហាញថារហូតមកដល់ពេលនេះមានទេសចរចិនប្រហែល ៣.០១ លាននាក់បានមកទស្សនាប្រទេសថៃហើយត្រូវបានចាត់ទុកថាចិនគឺជាប្រភពទីផ្សាដ៏សំខាន់សម្រាប់ឧស្សាហកម្មទេសចរណ៍របស់ថៃបើយោងតាមបទពិសោធកន្លងមកនៅមុនពេលដែលមានជំងឺរាតត្បាតតាំងពីឆ្នាំ ២០១៩ឃើញថាមានភ្ញៀវទេសចរចិនចំនួន ១១ លាននាក់ស្មើនឹងជាងមួយភាគបួននៃចំនួនទេសចរទាំងអស់នៅក្នុងឆ្នាំនោះ។
ទេសាភិបាលរង TAT លោក Chattan Kunjara Na Ayudhya ទទួលបន្ទុកទីផ្សារអន្តរជាតិប្រចាំតំបន់អាស៊ី និងប៉ាស៊ីហ្វិកខាងត្បូងបានប្រាប់សារព័ត៌មានថា “សេដ្ឋកិច្ចចិនមានការធ្លាក់ចុះធ្វើឲ្យពលរដ្ឋចិនមានកង្វល់លើការចំណាយសម្រាប់វិស័យទេសចរណ៍” ។
លោកបានបន្ថែមថា រួមទាំងព្រឹត្តិការណ៏បាញ់ប្រហារនៅផ្សារទំនើបក្នុងទីក្រុងបាងកកក៏ជាការគំរាមកំហែងមួយធ្វើឲ្យប៉ះពាល់ដល់ទំនុកចិត្តភ្ញៀវទេសចរផងដែរ។
លោកបានបន្តថា TAT នៅក្នុងខែមិថុនាសង្ឃឹមថានឹងមានទេសចរចិនចាប់ពី ៤ ទៅ ៤,៤ លាននាក់នៅក្នុងឆ្នាំនេះ។ គឺមានការធ្លាក់ចុះខុសពីគោលដៅរំពឹងទុកកាលពីដំបូងរបស់រដ្ឋាភិបាលដែលគិតថាមានចំនួន ៥ លាននាក់។
លោក Chattan បានបន្តថា ការមកដល់របស់ទេសចរបរទេសសរុបមានប្រហែល ២៣,៨៨ លាននាក់បើគិតតាំងពីដើមឆ្នាំមក។
រដ្ឋាភិបាលថៃកំពុងកំណត់គោលដៅសម្រាប់ការមកដល់ភ្ញៀវទេសចរចំនួន ២៨ លាននាក់ធៀបនឹងកំណត់ត្រាមុនជំងឺរាតត្បាតសម្រាប់ការមកដល់នៃភ្ញៀវទេសចរបរទេសជិត ៤០ លាននាក់នៅក្នុងឆ្នាំ ២០១៩ ដែលបានចំណាយប្រាក់ ១.៩១ ពាន់ពាន់លានបាត ស្មើនឹង៥៤.៣៧ ពាន់លានដុល្លារអាមេរិក។
អ្នកនាំពាក្យក្រសួងការបរទេសចិនលោក Mao Ning បានថ្លែងថា៖ “ ភាគីចិនតែងតែលើកទឹកចិត្តចិននិងថៃឲ្យពង្រឹងកិច្ចសហប្រតិបត្តិការទេសចរណ៍ទៅវិញទៅមក។
នៅពេលដែលត្រូវបានគេសួរនៅក្នុងសន្និសីទសារព័ត៌មានស្តីពីការប៉ាន់ប្រមាណភ្ញៀវទេសចររបស់ប្រទេសថៃថា “យើងក៏ដូចជាប្រទេសថៃគឺកំពុងតែទន្ទឹងរង់ចាំការមកធ្វើដំណើរកម្សាន្តទៅមកនៃអ្នកទេសចររបស់ប្រទេសទាំងពីរ” ៕
ប្រភព៖ Reuters